உணவில் தினமும் ஒரு கீரையைச் சேர்த்துக் கொண்டால், நோயற்று வாழலாம். அந்தளவில் நம் உடம்புக்குத் தேவையான சத்துகள், கீரை வகைகளில் நிறைந்து உள்ளன. இவ்வகையில், புளிச்சக்கீரை சாகுபடி மற்றும் அதன் பயன்களைப் பற்றி இங்கே பார்க்கலாம்.

பயன்கள்

+ புளிச்சக் கீரையில் இரும்புச்சத்து அதிகமாக உள்ளது. எனவே, இதை உணவில் சேர்த்து வந்தால், இரத்தச்சோகை குணமாகும்.

+ நோயெதிர்ப்பு சக்திமிக்க புளிச்சக்கீரை, காசநோயைக் குணமாக்கும்.

+ இரத்தத்தைச் சுத்திகரிப்பதில் புளிச்சக்கீரை முதலிடம் வகிக்கிறது.

+ புளிச்சக்கீரை, உடல் வெப்ப நிலை சீராக இருக்க உதவுகிறது.

+ அதனால், இக்கீரை, உடலுக்கும் குடலுக்கும் வளமூட்டும் கீரை எனப்படுகிறது.

சாகுபடி

+ சித்திரை, ஆடி, மார்கழி, மாசியில், புளிச்சக் கீரையைப் பயிர் செய்யலாம்.

+ சுவையும் சத்தும் மிகுந்த இந்தக் கீரை, இந்தியா முழுவதும் சாகுபடி செய்யப்படுகிறது.

+ இதில், வெள்ளைப்பூ பூக்கும் இரகம், சிவப்புப்பூ பூக்கும் இரகம் என, இரண்டு இரகங்கள் உள்ளன.

+ வெள்ளைப்பூ கீரையில் உள்ளதை விட, சிவப்புப்பூ கீரையில், புளிப்புச் சுவை அதிகமாக இருக்கும்.

+ செம்புளிச்சக்கீரை, கரும் புளிச்சக்கீரை ஆகிய இரகங்களும் உண்டு.

+ இந்தக் கீரை, வறட்சியை ஓரளவு தாங்கி வளரும் தன்மை மிக்கது. அதனால், வெப்பத்தைத் தாங்கி, பல்வேறு மண் வகைகளில் நன்றாக வளரும்.

+ நல்ல மண்ணும் மணலும் கலந்த, சற்று அமிலத்தன்மை உள்ள, இருமண் நிலம், செம்மண் நிலம் சாகுபடிக்கு ஏற்றவை.

+ இத்தகைய நிலத்தை, 2-3 முறை நன்றாக உழ வேண்டும். கடைசி உழவுக்கு முன், ஏக்கருக்குப் பத்து டன் தொழுவுரம் வீதம் இட்டுப் பரப்பி, சமப்படுத்த வேண்டும்.

+ மண்புழு உரம், கம்போஸ்ட் ஆகியவற்றையும் இடலாம்.

+ அடுத்து, நீர் வசதிக்கு ஏற்ப, தேவையான அளவில் பாத்திகளை அமைக்க வேண்டும்.

+ எக்டருக்கு 2.5 கிலோ விதைகள் தேவைப்படும். இவற்றைப் பார்களின் பக்கவாட்டில் ஊன்ற வேண்டும்.

+ விதைத்ததும் பாசனம் செய்ய வேண்டும். மூன்றாம் நாள் உயிர்நீர் விட வேண்டும். அடுத்து, நான்கு நாட்களுக்கு ஒருமுறை பாசனம் செய்யலாம்.

+ களைகளால் கீரைச் செடிகள் பாதிக்கப்படாமல் இருக்க, விதைத்து 10-15 நாட்கள் கழித்து, களையெடுக்க வேண்டும்.

+ இலைகள் அதிகமாகத் தழைத்து வர, ஒரு லிட்டர் நீருக்கு 30 மி.லி. பஞ்சகவ்யா வீதம் கலந்து காலை நேரத்தில், பத்து நாட்களுக்கு ஒருமுறை தெளிக்கலாம்.

+ ஜீவாமிர்தக் கரைசலைப் பாசனநீரில் கலந்து விடலாம். இதனால், கீரைகளின் வளர்ச்சி நன்றாக இருக்கும்.

+ கீரைகளில் பூச்சிகளின் தாக்குதல் இருந்தால், இஞ்சி, மிளகாய், பூண்டுக் கரைசலைத் தெளிக்க வேண்டும்.

+ இஞ்சி, பூண்டு மற்றும் பச்சை மிளகாயைச் சமமாக எடுத்து இடித்து, ஒரு லிட்டர் மாட்டுக் கோமியத்தில் கலந்து ஒருநாள் வைத்திருந்தால், இந்தக் கரைசல் தயாராகி விடும்.

+ இதைப் பத்து லிட்டர் நீருக்கு 300 மி.லி. வீதம் கலந்து, பத்து நாட்களுக்கு ஒருமுறை, காலை நேரத்தில் தெளிக்க வேண்டும்.