குறைவான விதை, குறைவான நீர், குறைவான வேலையாட்கள் மூலம், அதிகளவில் மகசூலைத் தருவது, திருந்திய நெல் சாகுபடி முறை. இப்போது பரவலாக இம்முறையில் நெல் சாகுபடியை விவசாயிகள் மேற்கொண்டு வருகின்றனர். இதைப்பற்றி இங்கே பார்க்கலாம்.
திருந்திய நெல் சாகுபடியின் கோட்பாடுகள்
+ ஏக்கருக்கு 2-3 கிலோ விதை போதுமானது.
+ ஏக்கருக்கு 1 சென்ட் நாற்றங்கால் போதுமானது.
+ 10-14 நாட்கள் என, குறைந்த வயதுள்ள நாற்றுகள் பயன்பாடு.
+ குத்துக்கு ஒரு நாற்றுப் போதுமானது.
+ 22.5×25 செ.மீ. இடைவெளியில் வரிசை நடவு செய்தல்.
+ இவ்வகையில், சதுர மீட்டருக்கு 16 குத்துகள் போதுமானது.
+ களையைக் கருவி மூலம் கட்டுப்படுத்துவதால் ஆட்செலவு குறைவு.
+ உருளும் களைக்கருவியால் பயிர் வளர்ச்சி அதிகமாகிறது.
+ வயலில் நீரைத் தேக்கி வைக்க வேண்டிய அவசியமில்லை.
+ பாசனநீர்த் தேவை 40-50 சதவீதம் குறைகிறது.
+ வேர் வளர்ச்சியால் சத்துகளின் பயன்பாடு கூடுகிறது.
+ அதிகத் தூர்கள், அதிகக் கதிர்கள் மற்றும் அதிக மணிகள் உற்பத்தி.
+ பயிர்களில் சாயாத தன்மை அதிகமாகிறது.
+ அதிகத் தானியம், அதிக வைக்கோல் மகசூல் மற்றும் அதிக இலாபம்.
திருந்திய நெல் சாகுபடி நாற்றங்கால்
+ நல்ல வடிகால் வசதியும், நீர் ஆதாரமும் உள்ள இடத்தில் நாற்றங்காலை அமைக்க வேண்டும்.
+ ஒரு ஏக்கர் நடவுக்கான நாற்றங்காலை அமைக்க, ஒரு சென்ட் நிலம், அதாவது 40 சதுர மீட்டர் இடம் தேவை.
+ இவ்வகையில், நடவு வயலின் அருகில், ஏக்கருக்கு 1×5 மீட்டர் அளவுள்ள எட்டு நாற்று மேடைகளை அமைக்க வேண்டும்.
+ நாற்றங்காலை, தோட்டக்கால் அல்லது தொழி முறையில் அமைக்க வேண்டும்.
+ வயல் மண் அல்லது மண்ணுடன் நன்கு மட்கிய தொழுவுரத்தைக் கலந்து நாற்றங்காலை அமைக்க வேண்டும்.
திருந்திய நெல் நாற்றங்காலின் பயன்கள்
+ குறைந்தளவு விதைகள் போதும்.
+ குறைந்தளவு இடம் போதும்.
+ நாற்றங்கால் பராமரிப்புச் செலவு குறைகிறது.
+ நாற்றுகளை நடவுக்கு எடுத்துச் செல்வது எளிது.
+ ஒற்றை நாற்றுகளை, எளிதாக நடவு செய்யலாம்.
+ நாற்றுகள் விரைவாக உயிர்ப் பிடித்து பசுமையாக வளரும்.
சதுர நடவு
+ இளம் நாற்றுகளை ஒரு குத்துக்கு ஒரு நாற்று முறையில், 22.5×25 செ.மீ, இடவெளியில், சதுர முறையில் நடவு செய்ய வேண்டும்.
+ சதுர முறையில் நடவு செய்ய, பயிருக்குப் பயிர் 22.5×25 செ.மீ. வரிசையில், நைலான் கயிற்றைப் பயன்படுத்த வேண்டும். இந்தக் கயிற்றில், 22.5×25 செ.மீ. இடைவெளியில் ரிப்பன் துண்டுகளைக் கட்டி, நடவு செய்ய வேண்டும்.
+ நாற்றுகளை ஆழமாக நடாமல், மேலாக நட வேண்டும். நாற்றுகளின் வேர்கள் மேல் நோக்கி இல்லாமல், படுக்கை வசத்தில் இருக்குமாறு நடவு செய்ய வேண்டும்.
சதுர நடவின் பயன்கள்
+ பயிர்களின் வயர்ச்சிக்குத் தேவையான இடைவெளி கிடைக்கிறது.
+ இதன் மூலம், பயிர்களுக்கு வேண்டிய வெய்யில், காற்று மற்றும் சத்துகள் தடையின்றிக் கிடைக்கும். இதனால், பயிர்களின் வளர்ச்சி சிறப்பாக இருக்கும்.
+ களைக்கருவியைக் குறுக்கும் நெடுக்குமாக இயக்க வழி வகுக்கிறது.
+ அதிகத் தூர்கள் மற்றும் கதிர்கள் உற்பத்தியாகி, அதிக மகசூல் கிடைக்கிறது.
களை நிர்வாகம்
+ உருளும் களைக்கருவி மூலம் களைகளை அமுக்கி, மண்ணைக் கிளறி விட வேண்டும்.
+ நடவு முடிந்து பத்து நாட்கள் கழித்து, பத்து நாட்களுக்கு ஒருமுறை, நான்கு தடவை குறுக்கும் நெடுக்குமாக இயக்க வேண்டும்.
+ இந்தக் களைக்கருவியை இயக்க ஒரு ஆள் மட்டுமே போதும்.
+ இக்கருவி மூலம் களைகளை நீக்க, ஏக்கருக்கு 2-3 ஆட்கள் தேவைப்படும்.
களைக்கருவியின் பயன்கள்
+ மண்ணைப் புரட்டி விடுவதால், நிலத்தில் அதிகக் காற்றோட்டம் ஏற்படுகிறது.
+ களைகள் மட்கி இயற்கை உரமாக மாறும்.
+ பயிர்களின் வளர்ச்சி ஊக்குவிக்கப்படுகிறது.
+ மேலுரத்தை மண்ணுடன் கலந்து விடுவதால், உர விரயம் தடுக்கப்படுகிறது.
+ பயிர்களுக்கு அதிகளவில் சத்துகள் கிடைக்கின்றன.
உர நிர்வாகம்
+ மண் பரிசோதனை செய்யாத இடங்களில், பொதுப் பரிந்துரைப்படி, 100 சத மணிச்சத்து, 25 சத சாம்பல் சத்தை, நடவுக்கு முன் அடியுரமாக இட வேண்டும்.
+ மேலும், ஏக்கருக்கு, 800 கிராம் சூடோமோனாஸ், 800 கிராம் அசோபாசை எடுத்து, 20 கிலோ தொழுவுரத்தில் கலந்து, நடவுக்கு முன் அடியுரமாக இட வேண்டும்.
+ ஏக்கருக்கு 5 கிலோ நுண்சத்துக் கலவை வீதம் எடுத்து, மேலுரமாகத் தெளிக்க வேண்டும்.
+ நட்ட 15-ஆம் நாள், முதல் மேலுரமாகத் தழைச்சத்தையும், 25 சதம் சாம்பல் சத்தையும் இட வேண்டும்.
+ பிறகு, ஒவ்வொரு வாரமும் பச்சை வண்ண அட்டை மூலம் அறிந்து, தழைச்சத்தை இட வேண்டும்.
+ அட்டைக் குறையீட்டு எண் 4-க்குக் குறைவாக இருக்கும் போது, தழைச்சத்தை இட வேண்டும்.
+ ஒவ்வொரு முறையும், குறுவைப் பட்டத்தில், ஏக்கருக்கு 14 கிலோ வீதமும், சம்பா பருவத்தில், 12 கிலோ வீதமும், தழைச்சத்தை இட வேண்டும்.
+ மீதமுள்ள 50 சதவீதச் சாம்பல் சத்தை, இரு பங்காகப் பிரித்து, தூர்க்கட்டும் பருவத்திலும், பஞ்சு கட்டும் பருவத்திலும் இட வேண்டும்.
நீர் நிர்வாகம்
+ பஞ்சு கட்டும் பருவம் வரை, காய்ச்சல் மற்றும் பாய்ச்சல் முறையில் பாசனம் செய்ய வேண்டும்.
+ 2.5 செ.மீ. உயரம் நீரை நிறுத்த வேண்டும். அந்த நீர் வடிந்து, நிலத்தில் இலேசான கீறல் வெடிப்புகள் தோன்றிய பிறகு, மறுபடியும் 2.5 செ.மீ. உயரம் நீர்க்கட்ட வேண்டும்.
+ பஞ்சு கட்டிய பிறகு, 2.5 செ.மீ. உயரம் நீரை நிறுத்தி, அந்நீர் மறைந்ததும் மறுபடியும் நீர்க்கட்ட வேண்டும்.
சிக்கனப் பாசனத்தின் பயன்கள்
+ மண்ணில் காற்றோட்டம் அதிகரிக்கிறது.
+ வேர்களின் வளர்ச்சிக் கூடுகிறது.
+ நீர்த்தேவை 14-20 சதம் குறைகிறது.
திருந்திய நெல் சாகுபடியின் நன்மைகள்
+ இளம் நாற்றை நடுவதால், தூர்ப்பிடிப்பு அதிகமாகிறது.
+ நுண்ணுயிர்கள் பெருகி, பயிர் வளர்ச்சியும், வேர் வளர்ச்சி அதிகரிப்பதால், பயிர்கள் இறுதி வரை சாய்வதில்லை.
+ சத்துகள் அதிகமாகக் கிடைப்பதால், அறுவடை சமயத்திலும் பயிர்கள் பசுமையாக இருக்கும்.
+ தானியம் மற்றும் வைக்கோல் மகசூல் கூடுகிறது.
+ நீரின் தேவை 20 சதம் குறைகிறது.
+ மகசூல் 15-20 சதம் கூடுகிறது.
முனைவர் ந.சதீஸ்குமார், முனைவர் இரா.நாகேஸ்வரி, முனைவர் இரா.ஜெயஸ்ரீனிவாஸ், முனைவர் ப.துக்கையண்ணன்.
