நன்மை செய்யும் ஒட்டுண்ணிகள்!

விவசாயத்தில் பூச்சித் தாக்குதல் என்பது, விளைச்சலைப் பாதிக்கும் முக்கியப் பிரச்னைகளில் ஒன்று. பயிர்களைத் தாக்கும் பூச்சிகளைக் கட்டுப்படுத்த, விவசாயிகள் பெரும்பாலும் இரசாயனப் பூச்சிக்கொல்லிகளைத் தான் பயன்படுத்துகின்றனர். ஆனால், அளவுக்கு அதிகமான இரசாயனப் பயன்பாடு, உற்பத்திச் செலவைக் கூட்டுவதுடன், நன்மை செய்யும் பூச்சிகளையும் பாதித்து, சூழல் சமநிலையைச் சீர்குலைக்கும்.

இதற்கு மாற்றாக, இயற்கை நமக்கு வழங்கியுள்ள சிறந்த தொழில் நுட்பம் தான் உயிரியல் பூச்சிக் கட்டுப்பாடு. இதில் முக்கியப் பங்கு வகிப்பவை நன்மை செய்யும் ஒட்டுண்ணிப் பூச்சிகள்.

ஒட்டுண்ணிகள் என்றால் என்ன?

பயிர்களைத் தாக்கும் தீமை செய்யும் பூச்சிகளின் முட்டைகள் அல்லது புழுக்களுக்குள் தங்களது முட்டைகளை இட்டு, அங்கேயே வளர்ந்து, அந்தப் பூச்சிகளைக் கட்டுப்படுத்தும் சிறிய உயிரினங்கள் தான் ஒட்டுண்ணிகள் எனப்படுகின்றன.

இவை, விவசாய நிலங்களில் இயற்கையாகவே இருக்கும். ஆனாலும் தேவையின் போது, உயிரியல் கட்டுப்பாட்டு மையங்களில் உற்பத்திச் செய்யப்படும் ஒட்டுண்ணிகளை நிலங்களில் விடுவதன் மூலம், தீமை செய்யும் பூச்சிகளின் பெருக்கத்தைக் குறைக்கலாம்.

முக்கிய ஒட்டுண்ணிப் பூச்சிகள்

பயிர்களைத் தாக்கும் தீய பூச்சிகளைக் கட்டுப்படுத்த, பல்வேறு ஒட்டுண்ணிப் பூச்சிகள் பயன்படுகின்றன. அவற்றில், டிரைக்கோகிரம்மா (Trichogramma) என்பது, அந்துப் பூச்சிகளின் முட்டைகளில் ஒட்டுண்ணியாக வளர்ந்து, அவற்றிலிருந்து தீமை செய்யும் புழுக்கள் வெளிவருவதைத் தடுக்க உதவுகிறது. இது, நெல், கரும்பு, பருத்தி உள்ளிட்ட பயிர்களில் குறிப்பிட்ட பூச்சிகளைக் கட்டுப்படுத்தப் பயன்படுகிறது.

கோட்டீசியா (Cotesia) குறிப்பிட்ட பயிர்களைத் தாக்கும் புழுக்களைக் கட்டுப்படுத்த உதவுகிறது. பிராக்கான் (Bracon), பருத்தி மற்றும் காய்கறிப் பயிர்களைத் தாக்கும் சில வகையான புழுக்களைக் கட்டுப்படுத்தப் பயன்படுகிறது. அதேபோல், கோனியோசஸ் (Goniozus), தென்னையைத் தாக்கும் கருந்தலைப் புழுக்களைக் கட்டுப்படுத்த உதவுகிறது.

இந்த ஒட்டுண்ணிப் பூச்சிகள் ஒவ்வொன்றும், ஒவ்வொரு வகையான தீய பூச்சிகளை, திறம்படக் கட்டுப்படுத்தும் தன்மை கொண்டவை. எனவே, பயிரையும் அதனைத் தாக்கும் பூச்சியையும் சரியாக அடையாளம் கண்டு, வேளாண் துறையின் பரிந்துரைப்படி பொருத்தமான ஒட்டுண்ணியைத் தேர்ந்தெடுத்து பயன்படுத்த வேண்டும். இதன் மூலம், இரசாயனப் பூச்சிக்கொல்லிகளின் பயன்பாட்டைக் குறைத்து, சுற்றுச்சூழலுக்கு உகந்த முறையில் பயிர்களைப் பாதுகாக்கலாம்.

நன்மை செய்யும் ஒட்டுண்ணிப் பூச்சிகள் (Parasitoids)

டிரைக்கோகிரம்மா (Trichogramma): இது, பூச்சிகளின் முட்டைகளை அழிக்கும், மிகச்சிறிய முட்டை ஒட்டுண்ணி ஆகும். கரும்பு, பருத்தி, நெல் போன்ற பயிர்களைத் தாக்கும் குருத்துப்பூச்சி மற்றும் காய்ப்புழுக்களின் முட்டைகளுக்குள் முட்டைகளை இட்டு, அவற்றை அழித்து விடும்.

கோட்டீசியா (Cotesia): இது, புழுக்களைத் தாக்கி அழிக்கும் புழு ஒட்டுண்ணி ஆகும். அந்துப்பூச்சிப் புழுக்களுக்குள் (Caterpillars) முட்டைகளை இட்டு, அந்தப் புழுக்களையே உண்டு வளர்ந்து, அவற்றின் உடலுக்கு வெளியே சிறியளவில் வெண்ணிறக் கூடுகளைக் கட்டும்.

பிராக்கான் (Bracon): இதுவும், சிறந்த புழு ஒட்டுண்ணி வகையாகும். பருத்தி இளஞ்சிவப்புக் காய்ப்புழு, தென்னை மற்றும் கரும்புப் புழுக்களைக் கடித்து அல்லது அவற்றின் மேல் முட்டைகளை இட்டு, இயற்கை முறையில் கட்டுப்படுத்த உதவுகிறது.

கோனியோசஸ் (Goniozus): இது முக்கியமாக தென்னையைத் தாக்கும் கருந்தலைப் புழுவை (Coconut Black Headed Caterpillar) அழிக்கப் பயன்படும் முக்கியமான ஒட்டுண்ணி ஆகும். பெண் குளவிகள் புழுக்களைக் குத்திப் பக்கவாதத்துக்கு உட்படுத்தி, அவற்றின் மேல் முட்டைகளை இட்டு அழிக்கும்.

நெல் முதல் தென்னை வரை

நெல்: நெற்பயிரில் தண்டுத் துளைப்பான் போன்ற பூச்சிகளின் முட்டைகளைக் கட்டுப்படுத்த, Trichogramma japonicum என்னும் ஒட்டுண்ணியைப் பயன்படுத்தலாம். வேளாண் துறையின் பரிந்துரைப்படி, நடவு செய்த 37, 44, 51 ஆகிய நாட்களில் ஒட்டுண்ணிகளை விட வேண்டும். ஒருமுறைக்கு எக்டருக்கு இலட்சம் ஒட்டுண்ணிகள் அல்லது அதற்குச் சமமான அட்டை அளவு பயன்படுத்தப்படுகிறது.

பருத்தி: பருத்தியில் காய்ப்புழுக்களை உருவாக்கும் அந்துப்பூச்சிகளின் முட்டைகளைக் கட்டுப்படுத்த, Trichogramma chilonis போன்ற ஒட்டுண்ணிகள் பயன்படுகின்றன. தயாரிப்பு மற்றும் பரிந்துரையைப் பொறுத்து, 15 நாட்கள் இடைவெளியில், மூன்று முறை விட வேண்டும்.

மக்காச்சோளம்: தண்டுத் துளைப்பான் உள்ளிட்ட பூச்சிகளைக் கட்டுப்படுத்த, தாக்கும் பூச்சியின் இனத்தை அடையாளம் கண்டு அதற்குப் பொருத்தமான உயிரியல் கட்டுப்பாட்டு முறையைத் தேர்ந்தெடுக்க வேண்டும். குறிப்பாக, படைப்புழுத் தாக்குதலுக்கு டிரைக்கோகிரம்மா மட்டுமே தீர்வாகாது. ஒருங்கிணைந்த பூச்சி மேலாண்மை அவசியம்.

கரும்பு: கரும்பில் இடைக்கணுத் துளைப்பானைக் கட்டுப்படுத்த, Trichogramma chilonis உதவுகிறது. இதை, எக்டருக்கு 2.5 சி.சி. வீதம், 15 நாட்கள் இடைவெளியில், ஆறு முறை, கரும்பின் நான்காம் மாதம் முதல் விட வேண்டும்.

தென்னை: தென்னையைத் தாக்கும் கருந்தலைப் புழுவைக் கட்டுப்படுத்த, Goniozus nephantidis என்னும் ஒட்டுண்ணி பயன்படுகிறது. இதை, எக்டருக்கு 3,000 ஒட்டுண்ணிகள் வீதம் எடுத்து, புழுக்களின் வளர்ச்சிப் பருவத்தைக் கண்காணித்து, பொருத்தமான நிலையில் விடுவது முக்கியம்.

காய்கறிகள்: தக்காளி, கத்தரி, வெண்டை, மிளகாய், முட்டைக்கோஸ் போன்ற பயிர்களில் பூச்சியின் வகையைப் பொறுத்து ஒட்டுண்ணிகள் தேர்வு செய்யப்படுகின்றன. குறிப்பிட்ட அந்துப்பூச்சிகளின் முட்டைகளைக் கட்டுப்படுத்த டிரைக்கோகிரம்மா இனங்கள் உதவலாம். எனினும், எல்லாப் பூச்சிகளையும் ஒரே ஒட்டுண்ணி கட்டுப்படுத்தாது.

ஒட்டுண்ணிகளை விடும் முறைகள்

• ஒட்டுண்ணிகளைச் சரியான நேரத்தில் விடுவது தான் வெற்றிக்கு அடிப்படை.
• முதலில், பயிரையும் தாக்கும் பூச்சியையும் அடையாளம் காண வேண்டும்.
• வேளாண் துறை அல்லது வேளாண்மைப் பல்கலைக் கழகத்தின் பரிந்துரைப்படி, சரியான ஒட்டுண்ணியைத் தேர்ந்தெடுக்க வேண்டும்.
• நம்பகமான உயிரியல் கட்டுப்பாட்டு மையத்திலிருந்து, தரமான ஒட்டுண்ணி அட்டைகள் அல்லது தயாரிப்புகளைப் பெற வேண்டும்.
• தயாரிப்பில் குறிப்பிடப்பட்டுள்ள அளவு, விடும் நாள், இடைவெளி ஆகியவற்றைப் பின்பற்ற வேண்டும்.
• ஒட்டுண்ணிகள் வெளிவரும் காலத்தில், அவற்றைப் பாதிக்கக்கூடிய இரசாயனப் பூச்சிக் கொல்லிகளைத் தவிர்க்க வேண்டும்.
• வயலைத் தொடர்ந்து கண்காணித்து பூச்சித் தாக்குதல் குறைகிறதா என்பதை மதிப்பிட வேண்டும்.

அளவு முக்கியம்

ஒட்டுண்ணிகளைப் பயன்படுத்துவதில், அளவும் காலமும் முக்கியம். ஒட்டுண்ணிகளின் எண்ணிக்கை, அட்டைகளின் எண்ணிக்கை, சி.சி. என்னும் அளவீடு ஆகியன, ஒன்றுக்கொன்று சமமானவை அல்ல. எனவே, பயிரின் வயது, பூச்சியின் வளர்ச்சிப் பருவம், தாக்குதலின் தீவிரம் மற்றும் ஒட்டுண்ணித் தயாரிப்பின் தரத்தைப் பொறுத்துப் பரிந்துரை மாறலாம்.

டிரைக்கோகிரம்மா ஒட்டுண்ணியை எப்படிப் பயன்படுத்துவது?

டிரைக்கோகிரம்மா என்பது, மிகச்சிறிய நன்மை செய்யும் குளவி வகையைச் சேர்ந்த பூச்சி. இது, தீமை செய்யும் அந்துப் பூச்சிகளின் முட்டைகளுக்குள் தனது முட்டைகளை இடுகிறது. இதனால், தீமை செய்யும் பூச்சிகள் முட்டைப் பருவத்திலேயே கட்டுப்படுத்தப்படுகின்றன.

பயன்படுத்தும் முறை

சரியான ஒட்டுண்ணி அட்டையைத் தேர்ந்தெடுத்தல்: பயிரையும் அதனைத் தாக்கும் பூச்சியையும் பொறுத்து, பொருத்தமான டிரைக்கோகிரம்மா இனத்தைத் தேர்ந்தெடுக்க வேண்டும். நம்பகமான வேளாண் உயிரியல் கட்டுப்பாட்டு மையத்திலிருந்து தரமான ஒட்டுண்ணி அட்டைகளைப் பெற வேண்டும்.

சரியான நேரத்தில் வயலில் விடுதல்: பூச்சித் தாக்குதல் ஏற்படக்கூடிய காலத்தை அறிந்து, பரிந்துரைக்கப்பட்ட பயிர்ப் பருவத்தில் ஒட்டுண்ணிகளை விட வேண்டும். அட்டையில் குறிப்பிடப்பட்டுள்ள ஒட்டுண்ணி வெளிவரும் தேதியைக் கவனிக்க வேண்டும்.

அட்டைகளை வயலில் பொருத்துதல்: அட்டைகளைச் சிறிய துண்டுகளாக வெட்ட வேண்டும். பயிர் இலைகளின் உட்புறத்தில், நேரடியாக வெய்யில் படாத வகையில் பொருத்த வேண்டும். வயலின் பல இடங்களில் சீராகப் பொருத்த வேண்டும்.

பூச்சிக்கொல்லி மருந்துகளைத் தவிர்த்தல்: ஒட்டுண்ணிகளை வயலில் விடும் போது இரசாயனப் பூச்சிக்கொல்லிகளைத் தெளிப்பதைத் தவிர்க்க வேண்டும். அவசியம் ஏற்பட்டால், ஒட்டுண்ணிகளைப் பாதிக்காத வகையிலான மாற்றுக் குறித்து, வேளாண் நிபுணரிடம் ஆலோசிக்க வேண்டும்.

இயற்கையைக் காக்கும் ஒட்டுண்ணிகள்

ஒட்டுண்ணிகளைப் பயன்படுத்துவது மட்டும் முழுமையான பூச்சிக் கட்டுப்பாடு அல்ல. வயல் கண்காணிப்பு, பாதிக்கப்பட்ட பகுதிகளை அகற்றுதல், பயிர்ச்சுழற்சி, பொறிகள் மற்றும் தேவைக்கேற்ற பிற உயிரியல் கட்டுப்பாட்டு முறைகளுடன் இணைத்துச் செயல்படுத்தும் போது, நல்ல பலன் கிடைக்கும்.

நன்மை செய்யும் பூச்சிகளைக் காப்பதும், தேவையற்ற இரசாயனத் தெளிப்பைத் தவிர்ப்பதும், பரிந்துரை அளவுகளில் இடுபொருள்களைப் பயன்படுத்துவதும், நீடித்த வேளாண்மைக்கு வழி வகுக்கும்.

ஒட்டுண்ணிகளைப் பயன்படுத்துவோம்; தீமை செய்யும் பூச்சிகளைக் கட்டுப்படுத்துவோம்; உற்பத்திச் செலவைக் குறைப்போம்; இயற்கைச் சமநிலையைக் காப்போம்; விவசாய வருமானத்தை உயர்த்துவோம்.

குறிப்பு: ஒட்டுண்ணிகளின் அளவு மற்றும் பயன்பாடு; பயிர், பூச்சியினம், தயாரிப்பு ஆகியவற்றைப் பொறுத்து மாறுபடும். இந்த ஒட்டுண்ணிகளை, தமிழ்நாடு வேளாண்மைப் பல்கலைக் கழகம் அல்லது வேளாண்மைத் துறையின் தற்போதைய பரிந்துரைப்படி, பயன்படுத்த வேண்டும்.

---

கா.அரிபுத்திரன்,

வேளாண்மை அலுவலர், உயிரியல் கட்டுப்பாட்டு ஆய்வகம், விருதுநகர்.