மண்வளம் காக்கும் ஆறு வழிமுறைகள்!

விவசாயத்தில் அதிக இலாபம் ஈட்டவும், தொடர் இழப்பைத் தவிர்க்கவும், இரசாயன உரங்களை அள்ளித் தெளிப்பதை விட, மண்வளத்தைப் பேணுவதே நோக்கமாக இருக்க வேண்டும் என்று, வேளாண் வல்லுநர்கள் கூறுகின்றனர். உற்பத்தித் திறன்மிக்க விவசாயத்துக்கு, நல்ல மண்ணே அடித்தளமாகும். அதுவே, பயிர்களுக்குத் தேவையான சத்துகளை வழங்கி, தலைமுறைகளைக் கடந்தும், நிலத்தை, விவசாயத்துக்கு உகந்ததாக வைத்திருக்கும்.

மண்ணின் கட்டமைப்பு, வளத்தன்மை மற்றும் உயிரியல் செயல்களைச் சரியாகப் பராமரிப்பதே மண்வளமாகும். வளமான மண், பயிர்களுக்கு வலுவான வேர்களையும், சீரான வளர்ச்சியையும் தருவதுடன், விவசாயிகளுக்கு அதிக மகசூலையும், சிறந்த இலாபத்தையும் கிடைக்கச் செய்யும்.

நல்ல மண்ணை எப்படிக் கண்டறிவது?

கட்டமைப்பு: கரிமப் பொருள்கள் என்னும் மட்கு அதிகமாக உள்ள மண், வேர்கள் எளிதாக ஊடுருவி வளரக்கூடிய, தளர்வான அமைப்பைக் கொண்டிருக்கும்.

நீர் மேலாண்மை மற்றும் உயிரினங்கள்: நீரைத் தேங்க விடாமல் ஈர்த்து வைக்கும் திறன், வளமான மண்ணில் அதிகமாக இருக்கும். மேலும், இத்தகைய மண்ணில் மண் புழுக்கள் மற்றும் நன்மை செய்யும் பூச்சிகளின் நடமாட்டம் அதிகமாக இருக்கும்.

அறிகுறிகள்: வளமான நிலத்தில், பயிர்கள் அனைத்தும் ஒரே சீராக, வலுவாக வளரும். வளமற்ற மண் கடினமாகவும், எளிதில் அரிப்புக்கு உள்ளாகக் கூடியதாகவும் இருக்கும். இதனால், போதுமான உரமிட்டாலும், பயிர்கள் பலவீனமாகவே இருக்கும்.

மண்வளத்தை மேம்படுத்தும் ஆறு வழிகள்

வல்லுநர்கள் பரிந்துரைக்கும் இந்த ஆறு வழிமுறைகளைக் கையாளுவதன் மூலம், நிலத்தின் தரத்தை எளிதாக உயர்த்தலாம்.

கரிமப் பொருள்களைச் சேர்த்தல்: நிலத்தில் மட்கிய உரம், தொழுவுரம் மற்றும் பயிர்க் கழிவுகளை அதிகளவில் பயன்படுத்த வேண்டும். இதனால், மண்ணின் ஈரப்பதமும், மண்வளமும் மேம்படும்.

அதிகமாக உழுவதைத் தவிர்த்தல்: நிலத்தை அடிக்கடி ஆழமாக உழுவது, மண்ணின் கட்டமைப்பையும், அதில் வாழும் நன்மை செய்யும் நுண்ணுயிரிகளையும் அழித்து விடும். எனவே, குறைந்தபட்ச உழவு முறையைக் கையாளுவதே சிறந்தது.

பயிர்ச்சுழற்சி முறை: ஒரு பயிரையே தொடர்ந்து பயிரிடாமல், பல்வேறு பயிர்களை மாற்றி மாற்றி இடுவதன் மூலம், குறிப்பாகப் பயறு வகைகளைப் பயிரிடுவதன் மூலம், மண்வளம் இயற்கையாகவே காக்கப்படும். இதனால், பூச்சிகள் மற்றும் நோய்ப் பரவலும் பெருமளவில் கட்டுப்படும்.

சரியான உரப்பயன்பாடு: உரம் போடுவதில் எப்போதும் சமநிலை அவசியமாகும். அதிகப்படியான இரசாயன உரங்கள், மண்ணைப் பாழாக்கி, நீண்ட கால உற்பத்தித் திறனைக் குறைத்து விடும்.

மண்ணரிப்பைத் தடுத்தல்: நிலத்தின் மேல்மண் காற்றால் அல்லது நீரால் அடித்துச் செல்லப்படாமல் இருக்க, மூடுபயிர்கள் (Cover crops), மட்கிய இலைதழைகள் (Mulch) மற்றும் முறையான வடிகால் வாய்க்கால்களை அமைக்க வேண்டும்.

மண் பரிசோதனை செய்தல்: அவரவர் பகுதிக்கு அருகிலுள்ள வேளாண் விரிவாக்க மையங்களில் மண் பரிசோதனை செய்வதன் மூலம், மண்ணின் அமில- காரத்தன்மை மற்றும் சத்துகளின் அளவைத் துல்லியமாக அறியலாம். இதனால், தேவையற்ற உரச் செலவுகளைத் தவிர்க்க முடியும்.

காசு மிச்சம், இலாபம் நிச்சயம்

வளமான மண் என்பது, வெறும் அழுக்கு அல்ல. அது. வாழும் அற்புதம். மண்வளம் சிறப்பாக இருந்தால், பயிர்களில் வறட்சியைத் தாங்கும் திறன் மற்றும் நோயெதிர்ப்புத் திறன் இயல்பாகவே கூடும். உரப்பயன்பாட்டுத் திறன் கூடுவதால், விவசாயச் செலவுகள் பாதியாகக் குறைந்து, காலப்போக்கில் நிகர இலாபம் இரட்டிப்பாகும். இன்று மண்ணைக் கவனித்துக் கொண்டால், நாளை வருவாய் மிகுந்த அறுவடை உறுதியாகும்.

---

கா.அரிபுத்திரன்,

வேளாண்மை அலுவலர், உயிரியல் கட்டுப்பாட்டு ஆய்வகம், விருதுநகர்.