பப்பாளிப் பயிரைத் தாக்கும் மிக முக்கியமான நூற்புழுக்களான, வேர் முடிச்சு மற்றும் மொச்சை வடிவ நூற்புழுக்கள், விதைகளின் முளைப்புத் திறனையும், செடிகளின் வளர்ச்சியையும் குறைக்கும். இலைகள் வெளிர் மஞ்சள் நிறத்திலும், வேர்கள், மணிகள் கோர்த்ததைப் போன்ற தோற்றத்திலும் காணப்படும். மேலும், பாதிக்கப்பட்ட வேர்களில், நீர் மற்றும் சத்துகளை உறிஞ்சும் திறன் குறைந்து, இலைகளின் வெப்பநிலை அதிகமாகும். எனவே, இதை ஈடு செய்ய முடியாமல் செடிகளில் நீராவிப்போக்கு ஏற்படும்.
இதனால், ஒளிச்சேர்க்கைக்கு முக்கியமான, வளிமண்டல கார்பன் டை ஆக்சைடு வாயுவை எடுக்க முடியாமல், பச்சையம் குறைந்து, குறைவான ஒளிச்சேர்க்கையே நடைபெறும். எனவே, பழங்களின் எண்ணிக்கை குறைவதுடன், அவற்றின் வடிவமும் சிறுத்து விடுவதால், ஒரு செடிக்கு 10 முதல் 14 கிலோ வரை, பழ மகசூல் இழப்பு ஏற்பட வாய்ப்புள்ளது.
தீர்வு: எனவே, இந்த நூற்புழுக்களைக் கட்டுப்படுத்த, நோயெதிர்ப்புத் திறனுள்ள கோ.1 இரகத்தைப் பயிரிடலாம். நாற்றுகளைத் தயாரிக்கத் தேவையான மண்ணை, நெடுநாள் வெய்யிலில் காய வைத்துப் பயன்படுத்தலாம். நாற்றுகள் உள்ள நெகிழிப் பைகளில், ஒரு லிட்டர் நீருக்கு ஒரு கிராம் வீதம் கலந்த, காப்பர் ஆக்சி குளோரைடு கரைசல் 25 மி.லி. மற்றும் 3 சதவீத பியூரிடான் குருணை மருந்து 1 கிராம் வீதம் கலந்து, நாற்றங்காலில் இட வேண்டும்.
மேலும், குழிகளை எடுத்துக் கன்றுகளை நடுவதற்கு முன்பும் மற்றும் பூக்கள் பூக்கும் போதும், எக்டருக்கு 33 கிலோ, மூன்று சதவீத பியூரிடான் குருணை மருந்து வீதம் இட்டு, உயர் விளைச்சலைப் பெறலாம்.
முனைவர் ப.செந்தில் குமார்,
முனைவர் க.நாகேஸ்வரி, முனைவர் பி.செந்தில் முருகன், தோட்டக்கலை ஆராய்ச்சி நிலையம், ஏற்காடு, சேலம் மாவட்டம்.
Discover more from பச்சை பூமி
Subscribe to get the latest posts sent to your email.
