நூற்புழுக்கள் மண்ணில் மறைந்திருந்து பயிர்களுக்குச் சேதம் விளைவிக்கிறது. வேரில், முடிச்சுகள் ஏற்படுதல், அழுகல் ஏற்படுதல், வளர்ச்சிக் குன்றுதல், இலைகள் மஞ்சள் நிறமாகி உதிருதல் போன்றவை, நூற்புழுக்கள் தாக்கிய பிறகு தெரியும் அறிகுறிகளாகும்.

எனவே, இந்த நூற்புழுக்களைக் கட்டுப்படுத்த, பல்வேறு முறைகள் கையாளப்படுகின்றன. நூற்புழுக் கொல்லிகள், எதிர் உயிரிகள், மண்ணை வெப்ப மூட்டுதல், கோடை உழவு செய்தல் போன்றவை சிறந்த முறைகளாகும். எனினும், இம்முறைகள் பணத்தைச் செலவிடும் முறைகளாகும். ஆனால், நோயெதிர்ப்புத் தன்மையுள்ள பயிர்களை சாகுபடி செய்தால், பண விரயம் இல்லாமல் நூற்புழுக்களைக் கட்டுப்படுத்தலாம். மேலும், நூற்புழுக்களின் வாழ்க்கைச் சுழற்சியையும் மட்டுப்படுத்தலாம்.

நெல் பயிரில், வெண்நுனி இலை நூற்புழு, வேர் நூற்புழுத் தாக்குதலைக் குறைக்க, டி.பி.எஸ்.1 மற்றும் டி.கே.எம்.9 போன்ற இரகங்களைத் தேர்வு செய்யலாம்.

வாழையில், வேரழுகல் மற்றும் வேர்த் துளைப்பான் நூற்புழுக்களைக் கட்டுப்படுத்த, மட்டி இரகத்தைப் பயிரிடலாம்.

தக்காளியில் வேர் முடிச்சு நூற்புழுத் தாக்குதல் மிகையாக இருக்கும். இதைக் கட்டுப்படுத்த, ஹிஸார் லலித் என்னும் இரகத்தைப் பயிர் செய்யலாம்.

உருளைக் கிழங்கில், முட்டைக்கூடு நூற்புழுக்களைக் கட்டுப்படுத்த, குப்ரி சுவர்ணா இரகம் சிறந்ததாகும்.

பப்பாளியில், மொச்சை வடிவ நூற்புழுக்கள் மற்றும் வேர் முடிச்சு நூற்புழுக்களைக் கட்டுப்படுத்த, கோ.3, கோ.6 ஆகிய இரகங்களைப் பயிரிடலாம்.