இந்திய செம்மறி ஆட்டினங்கள்!

ஊரக மக்களின் முக்கிய வாழ்வாதாரமாகச் செம்மறி ஆடுகள் விளங்கி வருகின்றன. பொதுவாகச் செம்மறியாடு என்று கூறினாலும், உலகளவில் இதில் பல்வேறு இனங்கள் உள்ளன. இவ்வகையில், இந்தியாவில் உள்ள முக்கியச் செம்மறி ஆட்டினங்களைப் பற்றிப் பார்க்கலாம்.

கோயம்புத்தூர் ஆடுகள்

• இந்தச் செம்மறி ஆட்டினம், தமிழ்நாட்டின் கோயம்புத்தூர் மாவட்டத்தில் பரவியுள்ளது.
• இது, கம்பளி உற்பத்திக்காக வளர்க்கப்படும் ஓர் இனமாகும்.
• வெள்ளை நிறத்திலுள்ள இந்த ஆடுகளின் தலை மற்றும் கழுத்துப் பகுதியில், கறுப்பு அல்லது நீலநிறப் பட்டைகள் காணப்படும்.
• வயது வந்த ஆண் ஆட்டின் சராசரி உடல் எடை 25 கிலோ இருக்கும்.
• வயது வந்த பெட்டை ஆட்டின் சராசரி உடல் எடை 20 கிலோ இருக்கும்.

 நீலகிரி ஆடுகள்

• இந்தச் செம்மறி ஆட்டினம், நீலகிரிச் செம்மறியாடு, தமிழ்நாட்டின் நீலகிரி மாவட்டத்தில் மட்டுமே காணப்படும் இனமாகும்.
• இந்த ஆடுகள் கம்பளி உற்பத்திக்காக வளர்க்கப்படுகின்றன.
• இந்த ஆடுகள் பெரும்பாலும் வெள்ளை நிறத்தில் இருக்கும். சில ஆடுகளின் உடலிலும் முகத்திலும், நீலநிறப் புள்ளிகள் காணப்படும்.
• காதுகள் அகலமாகவும், தட்டையாகவும், தொங்கியும் இருக்கும். ஆண் ஆடுகளுக்கு, கொம்பு மொட்டுகளும் தழும்புகளும் இருக்கும். பெட்டை ஆடுகளுக்குக் கொம்புகள் இருக்காது.
• வால் நடுத்தரமாகவும் மெல்லியதாகவும் இருக்கும். உரோமம் மென்மையாகவும் அடர்த்தியாகவும் இருக்கும்.
• வயது வந்த ஆண் ஆட்டின் சராசரி உடல் எடையும், பெட்டையாட்டின் சராசரி உடல் எடையும் 31 கிலோ இருக்கும்.

 மேச்சேரி ஆடுகள்

• மேச்சேரிச் செம்மறி ஆடுகள், தமிழ்நாட்டின், சேலம், ஈரோடு, கரூர், நாமக்கல் மாவட்டங்கள் மற்றும் தருமபுரி மாவட்டத்திடன் சில பகுதிகளிலும் வளர்க்கப்படுகின்றன.
• இந்த ஆடுகள் இறைச்சிக்காக வளர்க்கப்படுகின்றன.
• வயது வந்த ஆண் ஆட்டின் சராசரி உடல் எடை 36 கிலோ இருக்கும்.
• வயது வந்த பெட்டை ஆட்டின் உடல் எடை 22 கிலோ இருக்கும்.

 கீழக்கரிசல் ஆடுகள்

• இந்தச் செம்மறி ஆடுகள், தமிழ்நாட்டின் இராமநாதபுரம், சிவகங்கை, திருநெல்வேலி ஆகிய மாவட்டங்களில் வளர்க்கப்படுகின்றன.
• இது இறைச்சிக்காக வளர்க்கப்படும் இனமாகும்.
• இந்த ஆடுகள் கருஞ்சிவப்பு நிறத்தில் காணப்படும்.
• தலை, வயிறு மற்றும் கால்களில் கருநிறப் பட்டைகள் இருக்கும்.
• வால் சிறியதாகவும் மெல்லியதாகவும் இருக்கும்.
• முதிர்ந்த ஆண் ஆடுகள், வலுவான மற்றும் சுருண்ட கொம்புகளுடன் இருக்கும்.
• பெரும்பாலான ஆடுகளின் தொண்டைக்குக் கீழே சதைப்பிண்டம் காணப்படும்.
• வளர்ந்த ஆண் ஆட்டின் சராசரி உடல் எடை 29 கிலோ இருக்கும்.
• வயது வந்த பெட்டை ஆட்டின் சராசரி உடல் எடை 22 கிலோ இருக்கும்.

 வெம்பூர் ஆடுகள்

• இந்தச் செம்மறி ஆடுகள், தமிழ்நாட்டின், வெம்பூர், மேலக்கரந்தை, கீழக்கரந்தை, நாகலாபுரம், தூத்துக்குடி மற்றும் விருதுநகர் மாவட்டத்தில் உள்ளன.
• இது, இறைச்சிக்காக வளர்க்கப்படும் இனமாகும்.
• இந்த ஆடுகள் உயரமாக, வெள்ளை நிறத்தில் இருக்கும். இந்த ஆடுகளின் உடலில் சிவப்புப் புள்ளிகளும் காணப்படும். இவற்றின் காதுகள் வெளிநோக்கித் தொங்கிக் கொண்டிருக்கும்.
• முதிர்ந்த ஆண் ஆடுகளுக்குக் கொம்புகள் இருக்கும். பெட்டை ஆடுகளுக்குக் கொம்புகள் இருப்பதில்லை.
• வளர்ந்த ஆண் ஆட்டின் சராசரி உடல் எடை 35 கிலோ இருக்கும்.
• வளர்ந்த பெட்டை ஆட்டின் சராசரி உடல் எடை 28 கிலோ இருக்கும்.

 இராமநாதபுரம் வெள்ளை ஆடுகள்

• இந்தச் செம்மறி ஆடுகள், தமிழகத்தின், இராமநாதபுரம், சிவகங்கை, விருதுநகர் ஆகிய மாவட்டங்களில் வளர்க்கப்படுகின்றன.
• இது, இறைச்சிக்காக வளர்க்கப்படும் ஓர் இனமாகும்.
• இந்த ஆடுகள் வெள்ளை நிறத்தில் நடுத்தரமாக இருக்கும். சில ஆடுகளின் உடல் முழுதும் கருநிற அடையாளங்கள் இருக்கும்.
• முதிர்ந்த ஆண் ஆடுகளுக்கு வளைந்த கொம்புகள் இருக்கும். ஆனால், பெட்டை ஆடுகளுக்குக் கொம்புகள் இருப்பதில்லை.
• இந்த ஆடுகளின் காதுகள் நடுத்தரமாக இருக்கும். வால் குட்டையாகவும், மெல்லியதாகவும் இருக்கும்.
• கால்கள் சிறியளவில் மெல்லியதாக இருக்கும்.
• ஓராண்டில் இந்த ஆடுகளின் சராசரி உடல் எடை 16.30 கிலோ இருக்கும்.

 கச்சைக்கட்டி ஆடுகள்

• இந்த ஆடுகள், மதுரை மாவட்டம், வாடிப்பட்டிப் பகுதியில் உள்ள கச்சைக்கட்டிப் பகுதி மக்களால் பரவலாக வளர்க்கப்படுகின்றன.
• இவை, நடுத்தர அளவில், திடமான உடலமைப்புடன், கறுப்பு நிறத்தில் இருக்கும்.
• இந்த ஆடுகள் அடர்த்தியான உரோமத்துடன் இருக்கும். இவை, இறைச்சிக்காக வளர்க்கப்படுகின்றன. ஆண் செம்மறியாடுகள், சண்டையிடுவதில் பெயர் பெற்றவை.

 திருச்சிக் கறுப்பு ஆடுகள்

• இந்த ஆடுகள், தமிழ்நாட்டின், திருச்சி, பெரம்பலூர், தர்மபுரி, சேலம் ஆகிய மாவட்டங்களில் பரவியுள்ளன.
• இந்த ஆடுகள், கம்பளி உற்பத்திக்காக வளர்க்கப்படுகின்றன. இவற்றின் உரோமம் மிகவும் சொரசொரப்பாக இருக்கும்.
• இந்த ஆடுகளின் உடல், சிறியதாகவும் கறுப்பு நிறத்திலும் இருக்கும்.
• இவற்றின் காதுகள், குட்டையாகவும், கீழ்நோக்கியும் முன்னோக்கியும் அமைந்திருக்கும். வால், குட்டையாகவும் மெல்லியதாகவும் இருக்கும்.
• வயது வந்த ஆண் ஆட்டின் சராசரி உடல் எடை 26 கிலோ இருக்கும். பெட்டையாட்டின் சராசரி எடை 19 கிலோ இருக்கும்.

சென்னைச் சிவப்பு ஆடுகள்

• இந்தச் செம்மறி ஆடுகள், தமிழ்நாட்டின், சென்னை, காஞ்சிபுரம், திருவள்ளூர், விழுப்புரம், வேலூர், கடலூர், திருவண்ணாமலை ஆகிய மாவட்டங்களைப் பூர்வீகமாகக் கொண்ட செம்மறி இனமாகும்.
• இந்த ஆடுகள் பெரும்பாலும் பழுப்பு நிறத்தில் இருக்கும். சில ஆடுகளின் நெற்றி, தொடையின் உட்புறம் மற்றும் அடிவயிற்றில் வெள்ளை நிற அடையாளங்கள் காணப்படும்.
• காதுகள் நடுத்தர நீளத்தில், தொங்கிக் கொண்டிருக்கும். உடல் முழுவதும் குட்டை முடிகளால் மூடப்பட்டிருக்கும்.
• இவற்றின் வால், குட்டையாகவும் மெல்லியதாகவும் இருக்கும்.
• ஆண் ஆடுகளுக்குக் கொம்புகள் இருக்கும். பெட்டை ஆடுகளுக்குக் கொம்புகள் இருப்பதில்லை.
• இந்த ஆடுகள் திடமாகவும், வறட்சியைத் தாங்கியும் வளரும்.
• ஓராண்டில் இந்த ஆடுகளின் சராசரி உடல் எடை 49 கிலோ இருக்கும்.

 தக்காணி ஆடுகள்

• தக்காணிச் செம்மறி இனம் என்பது, இராஜஸ்தானின் கம்பளி ஆடுகளும், ஆந்திரம் மற்றும் தமிழ்நாட்டின் உரோமம் நிறைந்த ஆடுகளும் கலந்த இனமாகும்.
• இந்த ஆடுகள், மும்பை – தக்காணப் பகுதியிலும், கர்நாடகம் மற்றும் ஆந்திரப் பிரதேசத்தின் சில பகுதிகளிலும் உள்ளன.
• இந்த ஆடுகளின் உடல், சிறியதாகவும், திடமாகவும், மோசமான மேய்ச்சல் நிலச் சூழல்களைச் சமாளிக்க வல்லதாகவும் இருக்கும்.
• இந்த ஆடுகள், பல நிறங்களில் இருக்கும். குறிப்பாக, கறுப்பு மற்றும் சாம்பல் நிறத்தில் அதிகமாக இருக்கும்.
• ஒரு செம்மறி ஆட்டின் மூலம், ஆண்டுக்கு 4.54 கிலோ உரோமம் கிடைக்கும். இந்த உரோமம், தரம் குறைந்தும், மெல்லிய இழைகளின் கலவையாகவும் இருக்கும்.  
• இந்த உரோமம் பெரும்பாலும் கரடுமுரடான போர்வைகளைத் தயாரிப்பதற்குப் பயன்படுகிறது.
• இந்த ஆடுகள் பெரும்பாலும் இறைச்சிக்காகவே வளர்க்கப்படுகின்றன.

 நெல்லூர் ஆடுகள்

• இந்த ஆடுகள், ஆந்திரப் பிரதேசத்தின், நெல்லூர், பிரகாசம், ஒங்கோல் ஆகிய மாவட்டங்களில் பரவியுள்ளன.
• உயரமான இந்த ஆடுகளின் மார்பு, பிடரி, பிட்டம் ஆகிய இடங்களைத் தவிர மற்ற இடங்களில் அதிகமாக உரோமம் இருப்பதில்லை.
• கிடாய் ஆடுகளில் கொம்புகள் இருக்கும். பெட்டை ஆடுகளில் கொம்புகள் இருப்பதில்லை.
• கிடாய் ஆடுகளின் சராசரி உடல் எடை 36 கிலோ இருக்கும். பெட்டை ஆடுகளின் சராசரி உடல் எடை 28 கிலோ இருக்கும்.
• நெல்லூர் செம்மறி ஆடுகள், வெள்ளாடுகளைப் போலிருக்கும். இந்த இனம், இந்தியாவிலேயே மிகவும் உயரமான இனமாகும்.
• பெரும்பாலான ஆடுகள், வெளிர் பழுப்பு அல்லது கருஞ்சிவப்பு நிறத்தில் இருக்கும்.

 பந்தியா ஆடுகள்

• இந்த ஆடுகள், கர்நாடகத்தின், மாண்டியா மாவட்டத்தில் பரவியுள்ளன.
• இந்த ஆடுகள், வெள்ளை நிறத்தில் இருக்கும். இவற்றின் முகம் வெளிர் பழுப்பு நிறத்தில் இருக்கும். இந்தப் பழுப்பு நிறம் கழுத்து வரை பரவியிருக்கும்.
• கிடாய் ஆடுகளின் சராசரி உடல் எடை 35 கிலோ இருக்கும். பெட்டை ஆடுகளின் சராசரி உடல் எடை 23 கிலோ இருக்கும்.
• இந்த இனம், இந்திய இனங்களிலேயே மிகச் சிறந்த ஆட்டிறைச்சி உடல் வாகைக் கொண்டது.

 மார்வாரி ஆடுகள்

• இந்த ஆடுகள், இராஜஸ்தான் மாநிலத்தின் ஜோத்பூர் மாவட்டம் முழுவதும் மற்றும் ஜெய்ப்பூர் மாவட்டத்தின் சில பகுதிகளிலும் காணப்படுகின்றன. பாலி மற்றும் பார்மர் மாவட்டத்திலும், இந்த ஆடுகள் வளர்க்கப்படுகின்றன.
• இந்தச் செம்மறி ஆடுகள் திடமானவை. இவற்றின் உரோமம், கலப்பு உரோம அமைப்புள்ள, கரடுமுரடான தரை விரிப்புகள் உற்பத்திக்கு உதவுகிறது.
• இந்த ஆடுகள், உத்தரப் பிரதேசம் மற்றும் மத்தியப் பிரதேசத்தின் தொலைதூர மாவட்டங்களுக்கும், சில சமயங்களில் மராட்டிய மாநிலத்தின் வடக்குப் பகுதிகளுக்கும், வளர்ப்புக்காகக் கொண்டு செல்லப்படுகின்றன.
• ஒரு ஆட்டிலிருந்து ஆண்டுக்கு 0.90-1.81 கிலோ உரோமம் கிடைக்கும்.

 கத்தி ஆடுகள்

• இந்தச் செம்மறி ஆடுகள், உருவில் சிறியதாக இருக்கும். இவை, ஜம்முவின் கிஷ்வார், பதர்வா பகுதிகளில் காணப்படுகின்றன.
• குளிர் காலத்தில், இமாச்சலப் பிரதேசத்தின் குலு பள்ளத்தாக்கில் முகாமிடும் ஆடுகள், கோடையில் பீர்பஞ்சால் மலைகளின் உயரமான பகுதிகளில், குறிப்பாக, படார் மலைத்தொடரில் மேய்கின்றன.
• ஆண் ஆடுகளுக்குக் கொம்புகள் உண்டு, பெண் ஆடுகளுக்குக் கொம்புகள் இருப்பதில்லை.
• இவற்றின் முகம், பழுப்பு நிற முடிகளுடன் காணப்படும்.
• இவற்றின் உரோமம் மென்மையாகவும் பளபளப்பாகவும் இருக்கும். ஒரு ஆட்ட்டின் மூலம், ஆண்டுக்கு 1.13 கிலோ உரோமம் கிடைக்கும். ஆண்டுக்கு மூன்று முறை உரோமம் வெட்டப்படும்.
• இந்த உரோமம், உயர் தரமான குலுச் சால்வைகள் மற்றும் போர்வைகள் தயாரிப்பதற்குப் பயன்படுகிறது.

 பாலங்கீர் ஆடுகள்

• இந்தச் செம்மறி ஆடுகள், ஒடிசாவின் வடமேற்கு மாவட்டங்களான, பாலங்கீர், சம்பல்பூர் மற்றும் சுந்தர்கரைத் தாயகமாகக் கொண்டவை.
• இவற்றின் உருவம் நடுத்தரமாக இருக்கும். வெள்ளை, வெளிர் பழுப்பு அல்லது கலப்பு நிறங்களில் காணப்படும். சில ஆடுகள் கறுப்பு நிறத்திலும் இருக்கும்.
• இவற்றின் காதுகள் சிறியதாகவும் குட்டையாகவும் இருக்கும். வாலின் நீளம் நடுத்தரமாகவும், மெல்லியதாகவும் இருக்கும்.
• இவற்றின் உரோமம் மிகவும் சொரசொரப்பாக இருக்கும். கால்களிலும் வயிற்றிலும் உரோமம் இருக்காது. ஆண் ஆடுகளுக்கு மட்டும் கொம்புகள் இருக்கும்.

 பெல்லாரி ஆடுகள்

• இந்தச் செம்மறி ஆட்டினம் கர்நாடகத்தின், பெல்லாரி, தாவணகெரே மாவட்டங்கள் மற்றும் அவற்றை ஒட்டியுள்ள ஹாவேரி, சித்ரதுர்கா மாவட்டங்களைப் பூர்விகமாகக் கொண்டது.
• இந்த ஆடுகளுக்கு, கர்நாடகப் பகுதியிலும், தமிழ்நாட்டின் தெலங்கானா எல்லைப் பகுதிகளிலும் அதிகத் தேவையுள்ளது.
• இந்த இனம், இறைச்சிக்காக வளர்க்கப்படுகிறது. நடுத்தரமாகவும், வலிமையாகவும் இருக்கும்.
• இந்த ஆடுகளின் உடல் நிறம், வெள்ளை, கறுப்பு மற்றும் வெள்ளையின் பல்வேறு கலவைகளில் காணப்படும்.
• இந்த ஆடுகளின் காதுகள், நடுத்தர நீளத்தில், தட்டையாக இருக்கும். சுமார் 30 சதவீத ஆண் ஆடுகளில் மட்டுமே கொம்புகள் இருக்கும்.

 பாகர்வால் ஆடுகள்

• நாடோடிப் பழங்குடி மக்களால் வளர்க்கப்படும், பாகர்வால் செம்மறி ஆடுகள், மேய்ச்சல் மற்றும் சூழல் அடிப்படையில் இடம் பெயரக் கூடியவை,
• இவற்றுக்கு எனத் தனிப்பட்ட வாழ்விடம் எதுவும் இல்லை. குளிர் காலத்தில் ஜம்முவின் பீர்பஞ்சால் மலைத்தொடரில் இருக்கும். கோடையில் காஷ்மீர் பள்ளத்தாக்குக்கு இடம் பெயரும்.
• இந்த ஆடுகள் பெரும்பாலும் வெள்ளை நிறத்தில் இருக்கும். வேறு நிற ஆடுகளும் அரிதாக இருக்கும்.
• நடுத்தர அளவுள்ள இந்த ஆடுகளின் மூக்கு, ரோமானிய மூக்கைப் போலிருக்கும்.
• ஆண் ஆடுகளுக்குக் கொம்புகள் உண்டு. பெட்டை ஆடுகளுக்குக் கொம்புகள் இருப்பதில்லை.
• காதுகள் நீளமாகத் தொங்கும். வால் சிறியதாகவும் மெல்லியதாகவும் இருக்கும். உரோமம் சொரசொரப்பாகவும், விரிந்தும் இருக்கும்.

குரேஸ் ஆடுகள்

• இந்த ஆட்டினம், ஜம்மு காஷ்மீரில் உள்ள செம்மறி ஆட்டு இனங்களிலேயே மிகவும் பெரியது. காதுகள் நீளமாகவும், மெல்லியதாகவும், கூர்மையாகவும் இருக்கும்.
• இந்த ஆடுகள் பொதுவாக வெள்ளை நிறத்தில் இருக்கும். இருப்பினும் சில ஆடுகள் பழுப்பு அல்லது கறுப்பு நிறத்தில், பழுப்பு அல்லது கரும் புள்ளிகளுடன் இருக்கும்.
• இவற்றின் வால், மெல்லியதாகவும் குட்டையாகவும் இருக்கும். உரோமம், சொரசொரப்பாக இருக்கும்.

ஹாசன் ஆடுகள்

• இந்தச் செம்மறி ஆட்டினம், பெயருக்கு ஏற்றாற் போல், கர்நாடகத்தின் ஹாசன் மாவட்டத்தைப் பூர்விகமாகக் கொண்டாது.
• இந்த ஆடுகள், சிறிய மற்றும் நடுத்தர அளவில் இருக்கும். இவற்றின் உடல் வெள்ளையாகவும், வெளிர் பழுப்பு அல்லது கரும் புள்ளிகளுடன் காணப்படும்.
• இவற்றின் காதுகள், நடுத்தர நீளத்தில் தொங்கும்.
• இந்த இனத்தின் 39 சதவீத ஆண் ஆடுகள் கொம்புகளுடன் இருக்கும். பெட்டை ஆடுகளில் கொம்புகள் இருப்பதில்லை.
• உரோமம் வெள்ளையாகவும், மிகவும் சொரசொரப்பாகவும், விரிந்தும் இருக்கும். கால்களிலும் வயிற்றிலும் உரோமம் இருக்காது.

 ஜெய்சல் மேரி ஆடுகள்

• இந்தச் செம்மறி ஆட்டினம், இராஜஸ்தானின் ஜெய்சல் மேரி மாவட்டத்தைச் சேர்ந்தது என்பதால், அந்தப் பெயரிலேயே அழைக்கப்படுகிறது.
• இந்த ஆடுகள், இராஜஸ்தானின், ஜெய்சல்மேர், பார்மர், ஜோத்பூர் ஆகிய மாவட்டங்களில் பரவியுள்ளன.
• இந்த இனத்தின் ஆண் ஆடுகள் 15-18 மாதங்களிலும், பெண் ஆடுகள் 12-15 மாதங்களிலும் இனப்பெருக்கத் தகுதியை அடையும்.
• குட்டி ஈனுதல் 55-60 சதவீதமாக இருக்கும். ஒரு ஈற்றில் ஒரு குட்டியை மட்டுமே ஈனும்.
• இந்த ஆடுகள் பார்வைக்கு ஓரளவு சதுரமாகவும், உயரமாகவும் இருக்கும்.
• முகம் கறுப்பு அல்லது அடர் பழுப்பு நிறத்தில் இருக்கும். இந்த நிறம், கழுத்து வரை பரவியிருக்கும். மூக்கு, ரோமன் மூக்கைப் போலிருக்கும். காதுகள், நீண்டு தொங்கும். கொம்புகள் இருப்பதில்லை.
• வால் நடுத்தர நீளம் முதல் அதிக நீளம் வரை இருக்கும். இதன் உரோமம், வெள்ளை நிறத்தில், நடுத்தரத் தரத்தில், அடர்த்தியின்றி இருக்கும்.

 கேந்திரபடா ஆடுகள்

• இந்தச் செம்மறி ஆடுகள், ஒடிசாவின் கேந்திரபாரா, கட்டாக், ஜகத்சிங்பூர், பத்ரக், ஜாஜ்பூர் ஆகிய மாவட்டங்களில் பரவலாக உள்ளன.
• இந்த ஆட்டினம், இரட்டையர் மற்றும் மும்மூர்த்திகள் போன்ற பன்முறைப் பிறப்புகளுக்குக் காரணமான FecB சடுதிமாற்ற மரபணுவைக் கொண்ட, இந்தியாவில் இரண்டாவது மற்றும் உலகில் ஆறாவது இனமாக அடையாளம் காணப்பட்டுள்ளது.
• இந்தச் செம்மறி ஆடுகள் பெரும்பாலும் பழுப்பு நிறத்தில் இருக்கும். சில ஆண் ஆடுகளுக்குப் பொத்தான் போன்ற கொம்புகள் உண்டு.
• முகம், வயிறு மற்றும் கால்களில் முடிகள் இருக்காது. உடலின் மற்ற பகுதிகள் பளபளப்பற்ற முடிகளால் மூடப்பட்டிருக்கும்.
• இவற்றுக்குக் கிடைமட்டமான காதுகளும், குட்டையான, நேரான மற்றும் தொங்கும் வாலும் உண்டு.

 மக்ரா ஆடுகள்

• இந்தச் செம்மறி ஆடுகள், பிகானேரி சோக்லா அல்லது சக்ரி என்றும் அழைக்கப்படும். முன்பு, பிகானேரி என அறியப்பட்டது.
• இந்த ஆட்டினம், இராஜஸ்தான் மாநிலத்தில் உள்ள பிகானேர், நாகௌர், ஜெய்சல்மேர், சுரு ஆகிய மாவட்டங்களில் பரவலாக உள்ளன.
• இருப்பினும், இதன் தூய இனம், பிகானேர் மாவட்டத்தின், கிழக்கு மற்றும் தெற்குப் பகுதியில் மட்டுமே காணப்படுகிறது.
• இந்த ஆடுகள், நடுத்தரமாகவும் மற்றும் பெரியதாகவும் இருக்கும். இவற்றின் முகம், கண்களைச் சுற்றி வெளிர் பழுப்பு நிறப் புள்ளிகளுடன் வெள்ளையாக இருக்கும்.
• இந்த ஆடுகள், இளஞ்சிவப்பு நிறத்தில் இருக்கும். காதுகள் சிறியது முதல் நடுத்தரமானது வரையிலும், குழல் வடிவிலும் இருக்கும்.
• இந்த ஆடுகளுக்குக் கொம்புகள் இருப்பதில்லை. வால் நடுத்தரமான நீளத்தில் மெல்லியதாக இருக்கும்.
• இவற்றின் உரோமம், நடுத்தரத் தரத்தில், மிகவும் வெள்ளையாக, பளபளப்பாக, அதிக அடர்த்தி இல்லாமல் இருக்கும்.

 மல்புரா ஆடுகள்

• இந்தச் செம்மறி ஆட்டினம், இராஜஸ்தானில் வாழும் எட்டுச் செம்மறி ஆட்டினங்களில் முக்கிய இனமாகும்.
• இந்த இனத்தின் வளர்ந்த ஆண் ஆடுகள், சராசரியாக 40 கிலோ எடையும், பெண் ஆடுகள் 30 கிலோ எடையும் கொண்டிருக்கும்.
• இந்த ஆடுகளின் பிறப்பு எடை 77-3.50 கிலோவும், 6 மாத எடை 16.4-18.94 கிலோவும் இருக்கும்.
• இந்த ஆடுகள், நீண்ட கால்களுடன், ஓரளவு நல்ல உடலமைப்பில் இருக்கும்.
• இந்த ஆடுகளின் முகத்தில் இருக்கும் வெளிர் பழுப்பு நிறம், கழுத்து வரை பரவியிருக்கும்.
• காதுகள் குட்டையாக குழல் வடிவில் இருக்கும். அவற்றின் மேல் பக்கத்தில் சிறிய குருத்தெலும்பைப் போன்ற இணைப்பு இருக்கும்.
• இந்த ஆடுகளுக்குக் கொம்புகள் இருப்பதில்லை. வால் நடுத்தர நீளம் முதல் மெல்லிய நீளம் வரை இருக்கும்.
• இவற்றின் வெண்ணிற உரோமம், மிகவும் சொரசொரப்பாக, அடர்த்தியாக இருக்கும். வயிறு மற்றும் கால்களில் உரோமம் இருக்காது.

மார்வாரி ஆடுகள்

• இந்தச் செம்மறி ஆட்டினம், தென்மேற்கு இராஜஸ்தானின், மார்வார் பகுதியில் தோன்றியது. அதனால், அப்பகுதியின் பெயராலேயே அழைக்கப்படுகிறது.
• இந்த ஆடுகள் நடுத்தரமாக இருக்கும். முகம், வெளிர் பழுப்பு நிறத்தில் இருக்கும். தோல், இளஞ்சிவப்பு நிறத்தில் இருக்கும்.
• இந்த ஆடுகளுக்குக் கொம்புகள் இருப்பதில்லை. காதுகள் பெரியதாகவும், இலையைப் போன்றும் தொங்கிக் கொண்டிருக்கும். வால், குட்டையாக அல்லது நடுத்தரமாக, மெல்லியதாக இருக்கும்.
• உரோமம், சொரசொரப்பாக, அடர்த்தியாக, நீண்ட இழைகளுடன் இருக்கும். நெற்றி, வயிறு மற்றும் கால்கள் உரோமத்தால் மூடப்பட்டிருக்கும்.

 பாஞ்சாலி ஆடுகள்

• இந்தச் செம்மறி ஆடுகள், குஜராத்தின் பாஞ்சால் பகுதியில், பால் மற்றும் இறைச்சிக்காக வளர்க்கப்படுகின்றன.
• இந்த ஆடுகள், நீண்ட கால்களுடன் பெரியதாக இருக்கும். சிறப்பாக இடம் பெயரும் திறன் மிக்கவை.
• இவற்றின் உடல் வெள்ளையாக இருக்கும். தலை அல்லது முகப்பகுதி, கறுப்பு, கரும் பழுப்பு, பழுப்பு, வெளிர் பழுப்பு ஆகிய நிறங்களில் இருக்கும்.
• காதுகள் நீளமாகத் தொங்கிக் கொண்டிருக்கும். வால் நீளமாக இருக்கும். மடி நன்கு வளர்ந்திருக்கும். பால் உற்பத்தி ஒரு நாளைக்கு 4 முதல் 1.2 லிட்டர் வரை இருக்கும்.
• மூன்று நான்கு மாதத்தில் இந்த ஆடுகள், 18-20 கிலோ உடல் எடையை அடையும். வளர்ந்த ஆண் ஆடுகளின் எடை 53 முதல் 82 கிலோ வரையிலும், பெண் ஆடுகளின் எடை 32 முதல் 73 கிலோ வரையிலும் இருக்கும்.
• இந்த ஆடுகளின் உரோமம், சொரசொரப்பாக இருக்கும். ஓர் ஆட்டின் மூலம், ஓராண்டில் ஒரு கிலோ உரோமம் கிடைக்கும்.

பூஞ்சி ஆடுகள்

• இந்தச் செம்மறி ஆட்டினம், ஜம்மு காஷ்மீரின் ஜம்மு பிராந்தியத்தில் உள்ள பூஞ்ச், இராஜௌரி ஆகிய மாவட்டங்களைப் பூர்விகமாகக் கொண்டது.
• நன்கு வளர்ந்த ஆண் ஆட்டின் எடை 35-40 கிலோவும், பெண் ஆட்டின் எடை 25-30 கிலோவும் இருக்கும்.
• இந்த ஆடுகள் பெரும்பாலும் வெள்ளை நிறத்தில் இருக்கும்.
• மேலும், பழுப்பு முதல் வெளிர் கறுப்பு வரை மாறுபடும் புள்ளிகளுள்ள ஆடுகளும் உண்டு.
• இவற்றின் காதுகள், நடுத்தர நீளத்தில் இருக்கும். வால் குட்டையாக, மெல்லியதாக இருக்கும்.
• இந்த ஆடுகளின் கால்கள் குட்டையாக இருப்பதால், இவை குள்ளமான உடலமைப்பில் இருக்கும்.

 பூகல் ஆடுகள்

• பூகல் செம்மறி ஆட்டினத்தின் பெயர், இந்த இனத்தின் தாயகமான பிகானேர் மாவட்டத்தின் பூகல் தாலுகாவில் உருவானது.
• பெண் ஆடுகள் 15 மாதங்களிலும், ஆண் ஆடுகள் 18 மாதங்களிலும் இனப்பெருக்கத் தகுதியை அடையும். பொதுவாக ஓர் ஆடு ஒரு குட்டியை மட்டுமே ஈனும்.
• இந்த ஆடுகள், ஓரளவு நல்ல உடலமைப்புடன் இருக்கும். முகம், கறுப்பாக இருக்கும். கீழ்த்தாடை, வெளிர் பழுப்பு நிறத்தில் இருக்கும்.
• காதுகள் குட்டையாக குழல் வடிவில் இருக்கும். இந்த ஆடுகளுக்குக் கொம்புகள் இருப்பதில்லை.
• வால் குட்டையாக அல்லது நடுத்தர அளவில், மெல்லியதாக இருக்கும்.
• இவற்றின் உரோமம், வெள்ளை நிறத்தில், நடுத்தரக் கம்பளத் தரத்தில் இருக்கும்.

 ஷாஹாபாடி ஆடுகள்

• இந்தச் செம்மறி ஆட்டினம், பீகாரின், போஜ்பூர், ரோத்தாஸ் பக்ஸார் ஆகிய மாவட்டங்கள், பாட்னா மற்றும் கயா மாவட்டத்தைப் பூர்விகமாகக் கொண்டது.
• ஷாஹாபாடி (Shahabadi) ஆடுகள், நடுத்தரமாக, நீண்ட கால்களுடன், பெரும்பாலும் சாம்பல் நிறத்தில் இருக்கும். சில சமயங்களில் கரும் புள்ளிகளும் காணப்படும்.
• காதுகள் நடுத்தர அளவில் தொங்கிக் கொண்டிருக்கும். வால், மிகவும் நீளமாக, மெல்லியதாக இருக்கும்.
• உரோமம் மிகவும் சொரசொரப்பாக, அடர்த்தியாக, விரிந்து காணப்படும். கால்களிலும் வயிற்றிலும் உரோமம் இருக்காது.

 சோனாடி ஆடுகள்

• இந்தச் செம்மறி ஆட்டினம், இராஜஸ்தானின் முக்கியமான ஆட்டினமாகும்.
• இந்த ஆடுகள், வாழும் பகுதியின் இயற்கைச் சூழலுக்கு ஏற்ப, தம்மைத் தகவமைத்துக் கொள்வதால், பல நூற்றாண்டுகளாகப் பராமரிக்கப்பட்டு வருகின்றன.
• இவை, நல்ல திடமான உடலமைப்புடன், மால்புராவை விட, சற்றே சிறியதாக, நீண்ட கால்களுடன் காணப்படும்.
• இந்த ஆடுகளின் முகத்திலுள்ள வெள்ளை அல்லது வெளிர் பழுப்பு நிறம், கழுத்தின் நடுப்பகுதி வரை பரவியிருக்கும்.
• காதுகள் பெரியதாக, தட்டையாக, தொங்கிக் கொண்டிருக்கும். வால், மெல்லியதாக, நடுத்தர நீளத்தில் இருக்கும்.
• இந்த ஆடுகளுக்குக் கொம்புகள் கிடையாது. மடி, ஓரளவு வளர்ந்திருக்கும். உரோமம் வெள்ளையாக, சொரசொரப்பாக இருக்கும். வயிறு மற்றும் கால்களில் உரோமம் இருக்காது.

 திபெத்திய ஆடுகள்

• இந்தச் செம்மறி ஆடுகள் நடுத்தரமாக வெள்ளை நிறத்தில் இருக்கும். மூக்கு, கறுப்பு அல்லது பழுப்பு நிறத்தில், ரோமன் மூக்கைப் போலிருக்கும்.
• உடலில் பழுப்பு மற்றும் வெண் புள்ளிகளும் இருக்கும்.
• இந்த ஆடுகளுக்குக் கொம்புகள் உண்டு. காதுகள் சிறியதாக, அகலமாக, தொங்கிக் கொண்டிருக்கும்.
• உரோமம், மென்மையாக, அடர்த்தியாக இருக்கும். வயிறு, முகம் மற்றும் கால்களில் உரோமம் இருக்காது.

 போன்பாலா ஆடுகள்

• இந்தச் செம்மறி ஆடுகள், முற்றிலும் வெள்ளை அல்லது முற்றிலும் கறுப்பு அல்லது கறுப்பு-வெள்ளை ஆகிய நிறங்களில் இருக்கும்.
• இந்த ஆடுகள், நெடிய கால்களுடன் உயரமாக, நல்ல உடல் அமைப்பில் இருக்கும்.
• காதுகள் சிறியதாகவும் குழல் வடிவிலும் இருக்கும். வால் மெல்லியதாகவும் குட்டையாகவும் இருக்கும். உரோமம் சொரசொரப்பாக இருக்கும். வயிறு மற்றும் கால்களில் உரோமம் இருக்காது.

 செவ்வாடுகள்

• இந்தச் செம்மறி ஆடுகள், வெளிர் பழுப்பு, அடர் பழுப்பு, பழுப்புக் கலந்த மஞ்சள் ஆகிய நிறங்களில் இருக்கும்.
• இந்த ஆடுகளின் கொம்புகள், கிடை மட்டமாகவும், வெளிப்புறம், பின்புறம் வளைந்தும், தடித்த வரிகளுடனும், வெளிர் பழுப்பு நிறத்தில், மழுங்கிய கூம்பு வடிவ நுனியைப் போலிருக்கும்.

சோக்லா ஆடுகள்

• இந்தச் செம்மறி ஆடுகள், சிறியதாகவும், நடுத்தரமாகவும் இருக்கும். முகம், உரோமமின்றி, அடர் பழுப்பு நிறத்தில் இருக்கும். இந்த நிறம் கழுத்தின் நடுப்பகுதி வரை பரவியிருக்கும்.
• இந்த ஆடுகளின் தலை, நேராக இருக்கும். காதுகள் சிறியதாக, நடுத்தர நீளத்தில் இருக்கும். மேலும், குழல் வடிவில் மெல்லியதாக இருக்கும்.
• இவற்றின் வால், மெல்லியதாக, நடுத்தர நீளத்தில் இருக்கும். உரோமம், வெள்ளையாக, அடர்த்தியாக இருக்கும். வயிறு மற்றும் கால்களின் பெரும்பகுதி உட்பட முழு உடலும் உரோமத்தால் மூடப்பட்டிருக்கும்.

 சோட் நாக்புரி ஆடுகள்

• இந்த ஆடுகள், சிறியதாக, எடை குறைவாக, வெளிர் சாம்பல் மற்றும் பழுப்பு நிறத்தில் இருக்கும்.
• காதுகள் சிறியதாகவும், தலைக்கு இணையாகவும் இருக்கும். வால் மெல்லியதாகவும் குட்டையாகவும் இருக்கும்.
• உரோமம் சொரசொரப்பாக, விரிந்து காணப்படும். இந்த உரோமம் வெட்டப்படுவது இல்லை.

 கரோல் ஆடுகள்

• இந்தச் செம்மறி ஆடுகளின் தலை சிறியதாகவும், காதுகள் நடுத்தரமாகவும் இருக்கும். வால், குட்டையாகவும், மெல்லியதாகவும் இருக்கும். இப்படி, இந்த ஆடுகளின் உடல் கச்சிதமாக இருக்கும்.
• இந்த ஆடுகள், சாம்பல் மற்றும் வெள்ளை நிறத்தில் இருக்கும்.
• மடி ஓரளவு வளர்ந்திருக்கும். தாய் ஆடுகளிடமிருந்து கிடைக்கும் பாலைக் கொண்டே இரட்டைக் குட்டிகளை எளிதில் பராமரிக்க முடியும். ஒன்றுக்கு மேற்பட்ட குட்டிகளை ஈனும்.
• இந்த ஆடுகளின் உரோமம், சொரசொரப்பாக, அடர்த்தியாக இருக்கும்.

 காஜாலி ஆடுகள்

• இந்தச் செம்மறி ஆடுகள், கறுப்பு, வெள்ளை ஆகிய இரண்டு நிறங்களில் இருக்கும்.
• கறுப்பு நிற ஆடுகள், முழுக்க முழுக்க, கறுப்பு அல்லது கரும்பழுப்பு அல்லது பழுப்பு நிறத்தில் இருக்கும்.
• வெண்ணிற ஆடுகள், முழுக்க முழுக்க, வெள்ளை நிறத்தில் இருக்கும். கண்களைச் சுற்றியும், முகத்திலும், காதுகளிலும், கறுப்பு அல்லது அடர் பழுப்பு நிறத்தில் வட்டத் திட்டுகள் இருக்கும்.
• இந்த ஆடுகள், ரோமன் மூக்கு, நீளமாகத் தொங்கும் காதுகள், தரையைத் தொடும் நீளமான வாலுடன் (சுமார் 55 செ.மீ.) இருக்கும்.

 கர்னா ஆடுகள்

• இந்த ஆடுகள், உருண்டையான மற்றும் கச்சிதமான உடலமைப்பில், நடுத்தரமாக இருக்கும்.
• ஆண் ஆடுகளுக்கு, கூர்மையான நுனியுடன் கூடிய பெரிய, வளைந்த கொம்புகளும், எடுப்பான மூக்குக் கோடும் உண்டு.
• இவற்றின் உரோமம், கிரீம் வெள்ளை நிறத்தில் இருக்கும். காதுகள் நடுத்தரமாக இருக்கும். வால் மெல்லியதாகவும், நேராகவும், நடுத்தரமாகவும் இருக்கும்.

படன்வாடி ஆடுகள்

• இந்தச் செம்மறி ஆடுகள், நடுத்தரமாக, பெரியளவில் இருக்கும். இவற்றின் கால்கள் நீளமாக இருக்கும்.
• இந்த ஆடுகளின் முகம், பழுப்பு மற்றும் வெளிர் பழுப்புப் புள்ளிகளுடன் காணப்படும். காதுகள் நடுத்தரமாகவும் மற்றும் பெரியதாகவும், குழல் வடிவத்தில், மயிர்க் கற்றையுடன் இருக்கும்.
• வால் மெல்லியதாக, குட்டையாக இருக்கும். இந்த ஆடுகளுக்குக் கொம்புகள் இருப்பதில்லை. இவற்றின் வெள்ளை உரோமம், நடுத்தரத் தரை விரிப்புத் தரம் கொண்டது.

 இராம்பூர் புஷைர் ஆடுகள்

• இந்தச் செம்மறி ஆடுகள், நடுத்தரமாக இருக்கும்.
• இவற்றின் உரோமம், பெரும்பாலும் வெள்ளை நிறத்தில் இருக்கும். அத்துடன், பழுப்பு, கறுப்பு மற்றும் வெளிர் பழுப்பு நிறங்களும் கலந்திருக்கும்.
• உரோமம் நடுத்தரத் தரத்தில் அடர்த்தியாக இருக்கும். கால்கள், வயிறு மற்றும் முகத்தில் உரோமம் இருக்காது.
• காதுகள் நீளமாகத் தொங்கிக் கொண்டிருக்கும். முகம் குவிந்து, ரோமானிய மூக்கைப் போலக் காணப்படும்.

குறிப்பு: இவற்றைத் தவிர, டோர்செட், சஃபோல்க், மெரினோ, இராம்பூய்ட், செவியோட், சவுத் டவுன் ஆகிய கவர்ச்சிமிகு செம்மறி ஆட்டினங்களும் உள்ளன.

---

தொகுப்பு: மு.உமாபதி.